Fréttir

Þrír nemendur í 5.bekk GaV fengu verðlaun í Nýsköpunarkeppni grunnskólanna í Skagafirði. Bettý Lilja og Greta Berglind fengu verðlaun fyrir flottustu frumgerðina og Brynhildur Kristín fyrir flottustu kynninguna.

Þann 17. mars s.l. var haldin upplestrarkeppni grunnskólanna í Skagafirði og var keppnin haldin í Fjölbrautaskólanum á Sauðárkróki. Okkar fulltrúi, Ingunn Marín Ingvarsdóttir lenti þar í öðru sæti.

Á hverju ári fer fram eldvarnaátak hjá Landssambands slökkviliðs- og sjúkraflutningamanna. Nemendum í 3. bekk gefst kostur á að taka þátt í eldvarnagetraun og nú á dögunum fengu þrjú börn á Norðurlandi vestra viðurkenningar vegna átaksins.

Skólahald fellur niður í dag fimmtudaginn 11. mars vegna veðurs og ófærðar.

Í lok febrúar þá var unglingadeildinni boðin þátttaka í Hestadögum á Hólum. Hestadagarnir eru liður í æfingakennslu 1. árs nemenda við Hestafræðideild Háskólans á Hólum þar sem þeir fá tækifæri til að æfa sig í að kenna byrjendum og/eða aðeins vönum hestamennsku. Kennd voru bókleg og verkleg atriði sem tengdust hestum, hestahaldi og því að vera góður hestamaður.

Nemendur 1.-6.bekkjar í Grunnskólanum austan Vatna fengu nýverið endurskinsvesti að gjöf frá Kíwanisklúbbnum Drangey.

Frá áramótum höfum við á Hólum verið að taka fyrir mannslíkamann í allri sinni dýrð. Nemendur fræddust um kynþroskann, getnað, hvernig líkaminn vex og dafnar, lærðu um heiti líffæra, úr hverju við erum og hvað er hollt og gott fyrir líkamann.

Öskudagur er framundan 17. febrúar og nú er búið að skipuleggja dagskrá í tilefni dagsins. Við getum innan þess ramma sem samkomutakmarkanir og takmarkanir á skólastarfi leyfa hadið nær óbreyttri dagskrá eins og verið hefur undanfarin ár. Samkennsluhópar fara með sínum kennurum í þær stofnanir og fyrirtæki sem hafa gefið grænt ljós á að taka á móti okkur. Skóli byrjar á sama tíma og vanalega og fyrstu tímarnir verða nýttir til undirbúnings en eftir morgunmat verður lagt af stað og sungið sem aldrei fyrr.

Miðvikudaginn 3.febrúar skellti allur skólinn sér á skíði í Tindastól. Vorum við ofsalega heppin með veður þó það blési aðeins á tímabili. Óhætt er að segja að liprir taktar hafi sést hjá krökkunum og inn á milli gerðu kennararnir líka nokkuð góða hluti á skíðum. Ferðin var vel heppnuð í alla staði og fór flestir sælir heim en þreyttir eftir allt fjörið.

Síðustu tvær vikur hafa nemendur á unglingastigi stundað nám í ritun. Lögð hefur verið áhersla á uppbyggingu texta í nokkrum tegundum ritunar eins og frétta, smásagna o.s.frv. Spreyttu nemendur sig á mismunandi ritunaræfingum með áherslu á þjálfun í röksæmdarfærslum, persónusköpun ásamt almennri færni í ritun.